شهر .. وسنة .. صرخة من الخيام ~

شهر وسنة عم تمرق الايام
والليل باكي فوق خيمتنا

واطفال تحت البرد عم بتنام
خيمه وريح الظلم عصفتنا

وجدي مريض بتوكله الاسقام
اختي وانا منلوك دمعتنا

امي حزينه دموعها ارقام
ارقام تحكي بعد نكبتنا

تحكي عن المعراج يا اسلام
عن مهد عيسى وعن كنيستنا

وتحكي عـجور خوالنا وعمام
وتسكب ملح عـجرح طعنتنا

لوحات تعجز ريشه الرسام
بعد ودما ودموع عيشتنا

::\~

نحنا يا امي بذل ما بنام
ورد الردى والفدا عادتنا

لازم نفجر حمم من الخيام
ونسمع التاريخ صرختنا

ونحنا يا امي للوطن اعلان
من دمنا بنكتب قضيتنا

::\~

ويا امي انا دمعه من الايتام
ونوح الحناني فوق تينتنا

وشبابة الراعي ورا الاغنام
وعنت عتابه فراق ديرتنا

وتنهيده الحصاد تالي العام
وموال من رجات حقلتنا

وفيّة زيتونه معبعبين
وريحه خبز طابون حارتنا

::\~

يا امي انا صرخه دلال تصارع الاجرام
عا ارض حيفا وحد ديرتنا

وزهره فدائي فجر الالغام
بسابوي حتّى الناس سمعتنا

قوموا اسالو العرقوب والخّيام
تبنين تتغنى برجولتنا

فينا الكرامه تزايدت اكرام
الاغوار عم تبكي عسيرتنا

اهتز المجد فينا وعملنا وسام
تيعلقه بصدر امتنا

::\~

يا امي كفانا نعيش بالاوهام
كذب ودجل ووعود حاجتنا

حاجتنا نشكي الظلم للظلام
ونبوس ايد الي ذبحتنا

يا امي كفانا نعيش بالاحلام
ما عاد بدها شرح حالتنا

بدها بروده رصاصها الاقلام
والقنبله توقّع شكايتنا

بدها رجوله وتضحيه واقدام
بدها عروبه تصون ثورتنا

بدها عروبه تحطم الاصنام
وتشيل انور من عروبتنا

والقاهره ترجع لارض الشام
وتقول يا احباب الوفا
عودوا بعز وشرف
يا طيب عودتنا


: